Get real time updates directly on you device, subscribe now.
పబ్‌లు, ఫామ్‌హౌజ్‌లపై పోలీసుల ఆకస్మిక దాడులు.. కేసులు నమోదు
హ్యూమన్ రైట్స్ టుడే/హైదరాబాద్‌: మాదాపూర్‌లోని 16 పబ్‌ల పై పోలీసులు ఆకస్మిక దాడులు నిర్వహించారు. రెండు పబ్‌లలో నిబంధనలకు విరుద్ధంగా మైనర్లకు మద్యం సరఫరా చేసినట్టుగా పోలీసులు గుర్తించారు. హాట్‌ కప్‌, బర్డ్‌ బాక్స్‌ పబ్‌లపై కేసులు నమోదు చేసి నలుగురిని అదుపులోకి తీసుకున్నారు. మైనర్లకు మద్యం సరఫరా చేసినందుకు హాట్‌ కప్‌ పబ్‌పై, లైసెన్సు లేకుండా పబ్‌ నిర్వహిస్తున్న బర్డ్‌ బాక్స్‌ పబ్‌పై కేసు నమోదు చేశారు.
ఫామ్‌హౌజ్‌ లలో మద్యం సరఫరాపైనా పోలీసులు చర్యలు చేపట్టారు. అనుమతి లేకుండా ఫామ్‌హౌజ్‌లోకి మద్యం తీసుకెళ్లినందుకు మొయినాబాద్‌లోని సెలబ్రిటీ, ఎటెర్నిటీ, ముషీరుద్దీన్ ఫామ్‌హౌజ్‌లపై కేసులు నమోదు చేశారు. ఇటీవల సైబరాబాద్‌ కమిషనరేట్‌ పరిధిలోని ఫామ్‌హౌజ్‌లు, పబ్‌లపైనా పోలీసులు ఆకస్మిక తనిఖీలు నిర్వహించిన విషయం తెలిసిందే. శంషాబాద్‌, మొయినాబాద్‌, మేడ్చల్‌ శివారు ప్రాంతాల్లో ఉన్న దాదాపు 32 పబ్‌లలో తనిఖీలు నిర్వహించి నాలుగింటిలో నిబంధనలకు విరుద్ధంగా జూదం, అసాంఘిక కార్యక్రమాలు నిర్వహిస్తున్నారని గుర్తించారు. 22 మందిని అరెస్టు చేసి వ్యక్తిగత పూచీకత్తుపై విడుదల చేశారు.