Get real time updates directly on you device, subscribe now.
అప్పు చేసి పప్పు కూడు.. సగటు అప్పుల్లోనూ తెలంగాణ టాప్..!!
దేశంలో ఒక్కో కుటుంబంపై సగటున 90 వేల 372 రూపాయలు అప్పు ఉంటే..
తెలంగాణ రాష్ట్రంలో మాత్రం ఒక్కో కుటుంబంపై ఒక లక్ష 29 వేల 599 రూపాయల అప్పు ఉంది..
హ్యూమన్ రైట్స్ టుడే/ హైదరాబాద్/అక్టోబర్ 15: దేశంలో ఒక్కో కుటుంబంపై సగటున 90 వేల 372 రూపాయలు అప్పు ఉంటే తెలంగాణ రాష్ట్రంలో మాత్రం ఒక్కో కుటుంబంపై ఒక లక్ష 29 వేల 599 రూపాయల అప్పు ఉంది. ఇందులో వ్యవసాయ కుటుంబాలే అధికంగా ఉన్నాయని నాబార్డ్ తన రిపోర్ట్లో పేర్కొంది. 2016లో రాష్ట్రంలో అప్పుల్లో ఉన్న కుటుంబాల సంఖ్య 79% ఉంటే.. 2021-22 నాటికి అది 92%కి పెరిగింది. ఇది రాష్ట్రంలోని భూముల హోల్డింగ్పై ప్రభావం చూపుతున్నది.
ఈ సర్వే ప్రకారం రాష్ట్రంలో భూముల హోల్డింగ్ క్రమంగా తగ్గుతున్నది. గతంలో వ్యవసాయ కుటుంబాలకు ఇంటి జాగాతో పాటు సగటున రెండున్నర ఎకరాల భూమి ఉంటే అది రెండు ఎకరాలకు తగ్గింది. అదే దేశవ్యాప్తంగా సగటు భూమి హోల్డింగ్ 2016–17లో 1.08 హెక్టార్ల నుంచి 2021–22లో 0.74 హెక్టార్లకు తగ్గింది.
ఒకప్పుడు పల్లె అంటే ఎవుసం.. గ్రామీణ ప్రాంతాల్లోని జనం మొత్తం వ్యవసాయం, దాని అనుబంధ వృత్తులపై ఆధారపడి జీవించే వాళ్లు. కానీ కాలక్రమేణా పల్లెల్లో వ్యవసాయంపై ఆధార పడేవాళ్ల సంఖ్య తగ్గిపోతున్నది. తాజాగా నాబార్డ్ రిలీజ్ చేసిన ‘సెకండ్ ఆలిండియా రూరల్ ఫైనాన్షియల్ ఇంక్లూజన్ సర్వే 2021–22’లో ఇదే తేలింది.
తెలంగాణ పల్లెల్లో 55% మంది మాత్రమే వ్యవసాయంపై ఆధారపడి బతుకుతుండగా మిగిలిన 45% కుటుంబాలు వ్యవసాయేతర పనులు చేస్తున్నట్లు వెల్లడైంది. రాష్ట్రంలో రైతు కుటుంబాలకు సగటున కేవలం 2 ఎకరాల భూమి ఉందని, ఈ తరహా చిన్న కమతాల వల్ల వ్యవసాయం గిట్టుబాటు కాక చాలా మంది ప్రత్యామ్నాయ ఉపాధి మార్గాలు వెతుక్కున్నట్లు సర్వే తేల్చింది.
కొన్నేండ్లుగా పంటల మద్దతు ధరలు పెరుగుతున్నందున రైతుల ఆదాయం పెరుగుతున్నదని, కానీ, ఖర్చులు కూడా అదే స్థాయిలో పెరుగుతున్నాయని నాబార్డు తన రిపోర్ట్లో విశ్లేషించింది. వ్యవసాయంలో పెరిగిన పెట్టుబడులు, పెట్టుబడుల కోసం చేస్తున్న అప్పులు, వాటి వడ్డీలతో రైతుల పై భారం పడుతున్నది. అదీగాక ఒకప్పుడు రైతులు తమకు కావాల్సిన అన్నిరకాల కూరగాయలు, పండ్లు, పప్పులు, నూనెగింజలు తమ పొలంలో పండించుకునేవాళ్లు.
అయితే ప్రస్తుతం అవన్నీ బయట నుంచి ఎక్కువ రేట్లకు కొనుగోలు చేయాల్సిన పరిస్థితి ఏర్పడింది. దీనికి తోడు పెరిగిన వినియోగ సంస్కృతి పల్లెను తాకింది. ఖర్చులు విపరీతంగా పెరిగిపోయాయి. మారిన వాతావరణ పరిస్థితులు, పెరిగిన గాలి కాలుష్యం, నీటి కాలుష్యం, ఆహారపు అలవాట్లలో మార్పు వెరసి రోగాలు, వైద్య ఖర్చులు రెట్టింపయ్యాయి. ఫలితంగా ఆదాయం పెరిగినా ఖర్చులు తీసేస్తే మిగులు అంతంత మాత్రమేనని నాబార్డు తేల్చింది. రాష్ట్రంలో ఒక రైతు కుటుంబానికి సగటున రూ.781 మాత్రమే మిగులుతున్నాయంటే పరిస్థితి ఎంత దయనీయంగా ఉందో అర్థం చేసుకోవచ్చు.