Get real time updates directly on you device, subscribe now.
అమృతలూరు అమ్మాయి అదరగొట్టింది.. ల్యాండర్‌ సాఫ్ట్‌వేర్‌ టెస్టింగ్‌లో కీలక పాత్ర..
హ్యూమన్ రైట్స్ టుడే/బాపట్ల/అమృతలూరు/ఆగష్టు 24: ప్రపంచ దేశాల ముందు భారతదేశాన్ని గర్వపడేలా చేసిన ఇస్రో చంద్రయాన్‌-3 ప్రాజెక్టులో జిల్లాకు చెందిన యువ శాస్త్రవేత్త బొల్లు మానస భాగస్వామిగా ఉన్నారు. విక్రమ్‌ ల్యాండర్‌ సురక్షితంగా జాబిల్లిపై దిగేలా ఇస్రో రూపొందించిన సాఫ్ట్‌వేర్‌ టెస్టింగ్‌ కీలక శాస్త్రవేత్తల బృందంలో ఆమె ఒకరు. నాలుగేళ్లుగా శాస్త్రవేత్తలు చేసిన శ్రమ ఫలించి చంద్రుడి దక్షిణ ధ్రువంపై ల్యాండర్‌ను విజయవంతంగా దించిన తొలి దేశంగా ప్రపంచ పటంలో భారత్‌ను నిలిపి జాతి యావత్తూ గర్వపడేలా చేయడంలో భాగస్వామి అయి మహిళాశక్తి చాటారు. తెలుగు వారికి, ప్రతిభావంతులైన యువతకు గర్వ కారణమయ్యారు.
*తల్లిదండ్రుల ప్రోత్సాహంతో* ..
అమృతలూరుకు చెందిన బొల్లు మానస కేరళలోని తిరువనంతపురం ఐఎస్‌టీ కళాశాలలో ఏవియానిక్స్‌ చదివారు. ఉద్యోగరీత్యా తల్లిదండ్రులు వనజకుమారి, అనిల్‌కుమార్‌ గుంటూరులో స్థిరపడ్డారు. అమ్మానాన్నల ప్రోత్సాహంతో శాస్త్రవేత్తగా ఎదిగి దేశానికి సేవ చేయాలని పట్టుదలతో కష్టపడి చదివారు. 2014లో కోర్సు పూర్తయిన వెంటనే బెంగళూరు ఇస్రో శాటిలైట్ కేంద్రంలో శాస్త్రవేత్తగా ఉద్యోగంలో చేరారు. చంద్రయాన్‌-2 ప్రాజెక్టు సాఫ్ట్‌వేర్‌ టెస్టింగ్‌ విభాగంలోనూ ఈమె శాస్త్రవేత్తగా సేవలందించారు. 2019లో ల్యాండర్‌ చంద్రుడిపై దిగే సమయంలో అదుపు తప్పి కూలిపోవడంతో నిరుత్సాహానికి గురయ్యారు. భర్త పవన్‌ సాఫ్ట్‌వేర్‌ ఇంజినీర్‌గా బెంగళూరులో పనిచేస్తున్నారు.
*నాలుగేళ్ల శ్రమ*
ఎట్టి పరిస్థితుల్లోనూ చంద్రయాన్‌-3 ప్రాజెక్టును విజయవంతం చేసి దేశం, ఇస్రో ప్రతిష్ఠ పెంచాలని కలలు కన్నారు. నాలుగేళ్లు రాత్రింబవళ్లు శ్రమించారు. చంద్రయాన్‌-2లో జరిగిన తప్పులు గుర్తించి మళ్లీ పునరావృతం కాకుండా వందల సంఖ్యలో సిమ్యులేషన్స్‌ చేశారు. ఈసారి నూరుశాతం చంద్రుడి దక్షిణ ధ్రువంపై విక్రమ్‌ ల్యాండర్‌ కాలుమోపేలా సాఫ్ట్‌వేర్‌ రూపొందించి విజయవంతంగా పరీక్షలు చేశారు. బెంగళూరు ఇస్రో శాటిలైట్ కేంద్రం నుంచి చంద్రయాన్‌-3 విక్రమ్‌ ల్యాండర్‌ జాబిల్లిపై అడుగు పెట్టే సమయంలో శాస్త్రవేత్తల బృందంతో కలిసి పర్యవేక్షిస్తూ తీవ్ర ఉద్విగ్నతకు గురయ్యారు. చంద్రుడిపై ల్యాండర్‌ విజయవంతంగా దిగగానే సంతోషంతో చప్పట్లు కొట్టారు. నాలుగేళ్ల కష్టం ఫలించినందుకు ఆనందబాష్పాలు రాల్చారు.
*మానవ సహిత యాత్రకు దోహదం*
చంద్రయాన్‌-3 విజయం ఇస్రో శాస్త్రవేత్తల ఉమ్మడి కృషి వల్లే సాధ్యమైంది. ప్రధాని నరేంద్రమోదీ, దేశ ప్రజలు మాపై పెట్టుకున్న నమ్మకాన్ని నిలబెట్టుకున్నాం. ఈ విజయం చంద్రుడిపై మానవ సహిత యాత్రకు దోహదం చేస్తుంది. భవిష్యత్తులో అంగారకుడు, ఇతర గ్రహాలపైకి ఇస్రో పంపే మానవ రహిత ల్యాండర్లు, రోవర్లు అడుగు పెట్టడానికి సరికొత్త ఉత్సాహం, ప్రేరణ అందిస్తుంది. సూర్యుడిపైకి త్వరలో ప్రయోగిస్తున్న ఆదిత్య-ఎల్‌1 విజయవంతం కావడానికి సహచర శాస్త్రవేత్తలతో కలిసి శ్రమిస్తున్నా. అమ్మానాన్నలు, భర్తతో పాటు అత్తమామలు అరుణ, భక్తవత్సలరావు వెన్నుతట్టి ప్రోత్సహించారు. వారి వల్లే ఒత్తిడి తట్టుకుని కష్టపడి పనిచేయగలిగా. ఇంత వరకు చంద్రుడి దక్షిణ ధ్రువంపై ఏ దేశం ల్యాండర్‌ దిగలేదు. చంద్రయాన్‌-3 ద్వారా ప్రపంచంలో ఆ ఘనత సాధించిన తొలి దేశంగా భారత్‌ నిలిచి 140 కోట్ల మంది ప్రజలకు గర్వకారణంగా నిలవడంలో నా పాత్ర ఉన్నందుకు చెప్పలేనంత ఆనందంగా ఉంది.